2 may 2016-cı il tarixdə F.Köçərli adına Respublika Uşaq Kitabxanası “İnternet adi bir oyun vasitəsi deyil, internet bizim həyatımızdır” mövzusunda seminar-məşğələ keçirdi. Tədbirdə Yasamal rayonu, 53 sayli tam orta məktəbin altıncı sinif şagirdləri iştirak edirdi. Seminar-məşğələ iki hissədən ibarət idi. Birinci hissədə kitabxananın Kütləvi İşlər Şöbəsinin əməkdaşı “İnternetdən düzgün, təhlükəsiz istifadə qaydaları” adlı təqdimatla çıxış edərək, uşaqlara internetdən istifadə edərkən qarşılaşa biləcəkləri təhlükələr barədə məlumat verdi, virtual aləmdə yeniyetmələrin dələduzlar tərəfindən necə aldadılaraq təsir altına salınması, şantaj olunması və ailəyə məxsus bank hesab məlumatlarının oğurlanması barədə uşaqları xəbərdar etdi. Bununla yanaşı, sosial şəbəkələrdən istifadə edərkən hansı təhlükəsizlik qaydalarına riayət etməli olduqları, çətin və yaddaqalan şifrə yaratmağın yolları və s. barədə məlumatlar verdi və mövzu üzrə uşaqların verdiyi sualları cavablandırdı. Tədbirin ikinci hissəsində İncəsənət şöbəsinin əməkdaşı kitabxananın saytı (www/clb.az) ilə uşaqları tanış edərək bildirdi ki, Rusiyada 40 min, Avropada 50 min elektron kitabxana var. Dünyada belə məsələlər qanuna salınmır. Bu humanitar layihədir. Kitabxana portalı insanların elmi, ədəbi, estetik dəyərlərlə birbaşa təmasda olması üçün yaradılıb. Saytın bütün bölmələrini əyani şəkildə göstərərək, uşaqların elektron kitabxanadan, elektron kataloqdan, elektron kartotekadan necə istifadə edəcəklərini izah etdi. Tədbir çərçivəsində uşaqlar “İnternetdən nə üçün istifadə edirsiniz?” adlı video-sorğuya, mövzu ilə əlaqədar video-təqdimata, internet asılılığı ilə bağlı cizgi filminə tamaşa etdilər. Tədbirin sonunda “Google-dakı 9 surpriz yumurta” adlı məlumat şagirdlərin böyük marağına səbəb oldu. Uşaqlar şöbə tərəfindən hazırlanmış sərgi ilə də tanış oldular.Seminar-məşğələ davamlı olmaqla bu həftə ərzində hər gün müxtəlif məktəblərin V-VI sinif şagirdləri ilə keçiriləcəkdir.