10 iyun tarixində F.Köçərli adına Respublika Uşaq Kitabxanası 2016-cı il – “Multikulturalizm İli”nə həsr olunan “Uşaq Kitab Karvanı Şimal bölgəsində” səyyar kitab sərgisini Şabran rayonunda davam etdirdi. Uşaq Kitab karvanını Şabran rayon Mərkəzləşdirilmiş Kitabxana Sistemi qarşıladı. Tədbir Uşaq Yaradıcılıq Mərkəzinin qarşısında təşkil edilmişdi. Tədbirdə Şabran rayon Mədəniyyət və Turizm Şöbəsinin müdiri Əhməd Səmədov, İcra başçısının müavini Fikrət Nuşiyev, Təhsil, Mədəniyyət və Turizm şöbəsinin əməkdaşları, məktəblilər iştirak edirdi. Uşaqlar tədbirdə öz sevimli yazıçıları – Sevinc Nuruqızı, Reyhan Yusifqızı, Zahid Xəlil, Gülzar İbrahimova ilə görüşdülər. Şən musiqi sədaları altında keçən tədbirdə uşaqlar Azərbaycana, ulu öndərə, kitaba, vətənə aid şeirlər söylədilər, mahnılar ifa etdilər. Tədbirdən sonra uşaqlarla “İntelektual səviyyəmizi yüksəldək” adlı müsabiqə keçirildi. Yazıçıların iştirakı ilə keçirilən müsabiqədə daha çox xal toplayan oyunçu- qalib müəyyən edildi. Qalib - Şabran rayon 2 saylı orta məktəbin IX sinif şagirdi Quliyeva Nərmin “İntellektual oxucu” medalı ilə təltif olunaraq bir illik F.Köçərli adına Respublika Uşaq kitabxanasının təsis etdiyi “Göy qurşağı” uşaq jurnalına pulsuz abunə haqqı qazandı. Digər fərqlənən iştirakçılara da kitabxana tərəfindən hədiyyələr verildi. Tədbirdə uşaqlar yazıçılarla sıx təmasda oldular, onları maraqlandıran suallara cavab aldılar. Musiqi ilə başlayan tədbir kitab sərgilərinə baxış ilə yekunlaşdı. F.Köçərli adına Respublika Uşaq Kitabxanası 1000 nüsxədən çox kitab bağlamalarını Mərkəzləşdirilmiş Kitabxana Sisteminə hədiyyə etdi. Hədiyyə kitabları içərisində azsaylı xalqların mədəniyyətini özündə əks etdirən uşaq ədəbiyyatı nümunələri də var idi. Tədbirdən sonra qonaqlar Xətai Poeziya evində və Tarix Diyarşünaslıq muzeyində oldular.