9 iyun 2016-cı il tarixində Azərbaycan Respublikası Mədəniyyət və Turizm Nazirliyinin təşkilati dəstəyi ilə F.Köçərli adına Respublika Uşaq Kitabxanası  2016-cı il – “Multikulturalizm İli” nə həsr olunan “Uşaq Kitab Karvanı Şimal bölgəsində” ənənəvi layihəsini həyata keçirdi. Uşaq Kitab karvanını ilk qarşılayan Xızı rayon Mərkəzi kitabxanası oldu. Tədbir ulu öndərimizin adını daşıyan Heydər Əliyev muzeyi qarşısında təşkil edilmişdi. Tədbirdə Xızı rayon Mədəniyyət və Turizm Şöbəsinin müdiri Möhsün Bağırov, İcra başçısının müavini Jalə Süleymanova, Təhsil, Mədəniyyət və Turizm şöbəsinin əməkdaşları, məktəblilər iştirak edirdi. Uşaqlar tədbirdə öz sevimli yazıçıları – Sevinc Nuruqızı, Reyhan Yusifqızı, Zahid Xəlil, Gülzar İbrahimova ilə görüşdülər. Musiqili tədbirdə uşaqlar kitab, vətən haqqında şeirlər söylədilər, mahnılar ifa etdilər. Tədbirdən sonra uşaqlarla “Nağıl bilicisi” müsabiqəsi keçirildi. Dörd mərhələ üzrə keçirilən müsabiqədə qalib müəyyən edildi, “Nağıl bilicisi” medalı ilə təltif olundu. Digər fərqlənən iştirakçılara da kitabxana tərəfindən hədiyyələr verildi. Tədbirdə uşaqlar yazıçılarla sıx təmasda oldular, onları maraqlandıran suallara cavab aldılar. Tədbir yüksək əhval-ruhiyyə ilə başa çatdı. F.Köçərli adına Respublika Uşaq Kitabxanası 1000 nüsxədən çox kitab bağlamalarını Mərkəzləşdirilmiş Kitabxana Sisteminə hədiyyə etdi. Hədiyyə kitabları içərisində azsaylı xalqların mədəniyyətini özündə əks etdirən uşaq ədəbiyyatı nümunələri də var idi.