F.Köçərli adına Respublika Uşaq Kitabxanasının əməkdaşları 19 yanvar  2017-ci il tarixdə Bakı şəhərində yerləşən M.Rahim adına 7 saylı tam orta məktəbin 6-cı sinif şagirdləri ilə birgə Azərbaycan İstiqlal Muzeyinə ekskursiya təşkil etdilər.  Ekskursiya zamanı şagirdlər muzeyin ekspozisiyasında 20 Yanvar faciəsinin  27-ci ildönümünə həsr olunmuş “Keçmişi unutmayaq!” adlı sərgi ilə tanış oldular. Qeyd edək ki, Azərbaycan İstiqlal Muzeyinin  sərgi salonlarının birində, Azərbaycan Dövlət Rəssamlıq Akademiyasının, İncəsənət Kollecinin və Maarifçilik Akademiyasının tələbələrinin və bir çox rəssamların 20 Yanvar faciəsinə həsr olunan 40-a yaxın əsərləri nümayiş olunurdu.1990-cı il yanvar ayının 19-dan 20-nə keçən gecə keçmiş Sovet İttifaqının qoşun hissələri fövqəladə vəziyyət elan etmədən Bakı şəhərinə daxil olmuş və dinc əhaliyə divan tutmuşdur. Milli azadlıq, ölkəsinin ərazi bütövlüyü uğrunda mübarizəyə qalxmış xalq kütləvi terrora məruz qalmış, yüzlərlə günahsız insan qətlə yetirilmiş və yaralanmışdır. Sonda muzeyin əməkdaşı şagirdlərə  20 Yanvar faciəsi haqqında ətraflı məlumat verdi və faciəyə həsr olunmuş film nümayiş olundu.