21 avqust 2017-ci ildə F.Köçərli adına Respublika Uşaq Kitabxanası görkəmli dirijor və bəstəkar Niyazinin anadan olmasının 105 illiyi münasibətilə Maestronun mənzil muzeyinə ekskursiya etdi. Ekskursiyada kitabxananın əməkdaşları və oxucuları iştirak etdilər. Muzeyin şöbə müdiri Xanım Abdinova Maestro Niyazinin yaradıcılığı, Azərbaycan musiqi mədəniyyətində əvəzsiz xidmətlərindən danışaraq ekskursantları məlumatlandırdı. Xanım Abdinova Maestronun yemək otağı, yataq otağı, iş otağı, ekspozisiya otağı ilə ekskursantları tanış edərək bildirdi ki, otaqlar Niyazinin dövründə olduğu kimi qorunub saxlanılmışdır. Ekspozisiya otağında Niyazinin uşaqlığından başlayaraq həyatının son illərinədək həyat və yaradıcılığını əks etdirən foto–şəkillər, not əlyazmaları, afişalar, proqramlar və s. eksponatlar, qonaq otağında isə Niyazinin ictimai fəaliyyətini əks etdirən foto-şəkillər, müxtəlif illərdə Maestroya bağışlanmış və muzey tərəfindən əldə olunmuş rəngkarlıq əsərləri nümayiş etdirilir. Qeyd edək ki, görkəmli dirijor 1912-ci il avqustun 20-də Tiflisdə anadan olub. Sonda muzeyin arxiv materialları əsasında hazırlanan, Niyazinin həyat və yaradıcılığını əks etdirən slayd-şou izlənildi.