3 aprel 2017-cı il tarixində F.Köçərli adına Respublika Uşaq Kitabxanasının 2 saylı filialı Xətai rayonundakı 265 saylı tam orta məktəbdə Beynəlxalq Uşaq Kitabı Günü münasibətilə “Şeir sevən balalar” –adlı şeir müsabiqəsi keçirdi. Müsabiqədə I-IV siniflər iştirak edirdi. Tədbirdə çıxış edən 265 saylı məktəbin ibtidai sinif müəlliməsi M.Ruqiyyə qeyd etdi ki, uşaqların tərbiyəsində kitablar xüsusi yer tutur. Kitab onları zəngin mənəvi zövqə malik bir insan kimi tərbiyə edir, öz xalqının zəngin tarixi keçmişinə dərindən bələd olmasına imkan yaradır. Uşaq Kitabı Gününün məhz bu tarixə təsadüf etməsinin maraqlı bir tarixçəsi vardır. Məşhur nağılçı Hans Xristian Andersen 1805-ci il aprelin 2-də anadan olmuşdur. Beynəlxalq Uşaq Kitabı Gününün bu tarixdə qeyd olunmasını alman yazıçısı Yella Lepman təklif etmişdir. 1967-ci ildə Beynəlxalq Uşaq Kitabları Şurası tərəfindən isə Danimarka yazıçısı, uşaqların sevimlisi Hans Xristian Andersenin dünyaya gəldiyi gün – aprelin 2-si Beynəlxalq Uşaq Kitabı Günü kimi təsis edilmişdir. Keçirilən müsabiqə Beynəlxalq Uşaq Kitabı gününə həsr edilmişdir. Sonda F.Köçərli adına Respublika Uşaq Kitabxanası 2 saylı filialının əməkdaşları müsabiqə qaliblərini “Göy qurşağı” jurnalı ilə mükafatlandırdılar.