25 may 2018- ci il tarixində F.Köçərli adına Respublika Uşaq Kitabxanası, Nizami rayon E.Cəlilov adına 272 saylı tam orta məktəbin müxtəlif sinif şagirdləri ilə Azərbaycan Xalq Cümhuriyyətinin yaranmasının 100 illik yubileyinə həsr olunmuş tədbir keçirdi. Tədbir, məktəbin tarix müəllimi tərəfindən Azərbaycan Xalq Cümhuriyyətinin tarixi və qurucuları haqqında ətraflı məlumat verilməsi ilə başladı. Məktəblilərin təqdimantında Azərbaycan Respublikasının dövlət rəmzlərindən olan Bayrağımıza, Himnimizə eləcə də, Cümhuriyyətə aid vətənpərvər ruhda yazılmış şeirlər, mahnılar ifa olundu. Bununla yanaşı, şagirdlərin  Azərbaycan Xalq Cümhuriyyətinin qurucularının obrazlarını yüksək məharət və fəxr hissi ilə canlandırmaları tədbir iştirakçılarını qürurlandırdı. Sonra, Məhəmməd Əmin Rəsulzadənin Azərbaycan Xalq Cümhuriyyəti haqqında etdiyi çıxışı dinləndi. Sonda, kitabxananın direktoru Ş. Qəmbərova müəllim kollektivinə xüsusilə də uşaqlara bugünkü çıxışlarına görə öz minnətdarlığını bildirdi və qeyd etdi ki, dövlət başçısı İlham Əliyevin 2017-ci il may ayının 16-da imzaladığı “Azərbaycan Xalq Cümhuriyyətinin 100 illik yubileyi haqqında” sərəncama əsasən, cümhuriyyətin yaradılmasının 100 illik yubileyinin respublikada dövlət səviyyəsində geniş qeyd olunması və keçirilən silsilə tədbirlər gələcəyimiz olan uşaqların yaddaşında daha da möhkəmlənməsi üçün çox əhəmiyyətlidir . Ş.Qəmbərova məktəblilərə  kitabxana adından cümhuriyyətə dair kitablar və kitabxananın təsis etdiyi “Göy Qurşağı” uşaq jurnalının son nömrəsini hədiyyə etdi. Tədbir, xatirə şəkillərinin çəkilişi ilə başa çatdı.