7 fevral 2018- ci il tarixində Azərbaycanın Milli Qəhrəmanı Mübariz İbrahimovun anadan olmasının 30 illiyi ilə əlaqədar F.Köçərli adına Respublika Uşaq Kitabxanasının xidmət şöbəsinin əməkdaşları Nərimanov rayonundakı Novruzov qardaşları adına 36 saylı tam orta məktəbin VII sinif şagirdləri ilə anım gecəsi keçirdi. Tədbir şəhidlərin ruhunu bir dəqiqəlik sükutla yad edilməsi ilə başladı. Sonra kitabxana əməkdaşı Mübariz İbrahimovla bağlı məktəblilərə ətraflı məlumat verdi. Bildirdi ki, Azərbaycanın həmişə düşmən qarşına çıxan oğulları olub. Belə oğullar millətin varlığını, qeyrətini, namusunu qoruyublar. Mübariz yaxşı bilirdi ki, o döyüşdən sağ-salamat çıxa bilməyəcək. Ancaq Vətən sevgisi, torpaq sevgisi, onda olan vətənpərvərlik ruhu onu şəhidlik zirvəsinə ucaltdı. Mübariz bütün gənclərimiz üçün örnəkdir, nümunədir. Tədbir iştirakçıları Mübariz İbrahimova həsr olunmuş slaydın nümayişi ilə davam etdi. Uşaqlar Mübariz İbrahimovla bağlı şeirlər səsləndirdilər, qəhrəmanın şücaətini nümayiş etdirdiyi səhnəciklər canlandırdılar. Tədbir kitabxana əməkdaşlarının təşkil etdiyi kitab sərgisinin izlənilməsi başa çatdı.