21 noyabr 2018-ci il tarixində, F.Köçərli adına Respublika Uşaq Kitabxanasında görkəmli alim, yazıçı və pedaqoq Mir Cəlal Paşayevin 110 illik yubileyinə həsr olunmuş “Danışan ilmələr” adlı  tədbir keçirildi. Tədbirdə, Nəsimi rayonu Akif Abdullayev adına 211 saylı tam orta məktəbin 6-cı sinif şagirdləri iştirak edirdi. Tədbir iştirakçıları, Mir Cəlal Paşayevə həsr olunmuş kitab sərgisi ilə tanış oldular. Tədbirdə görkəmli alim Mir Cəlal Paşayevin Azərbaycan elminin, ədəbiyyatının və təhsilinin inkişafındakı misilsiz xidmətlərindən danışıldı. Qeyd olundu ki, görkəmli yazıçı, böyük alim və pedaqoq Mir Cəlal Paşayev Azərbaycan ədəbi-bədii fikrində və elmində özünəməxsus yeri olan böyük bir şəxsiyyətdir. Kitabxananın elmi işlər üzrə direktor müavini Zahirə Dadaşova həyatını, elmimizin və ədəbiyyatımızın inkişafina sərf edən böyük şəxsiyyətin xeyirxah əməlləri ilə Azərbaycan xalqının yaddaşında əbədi yaşayacağını oxucuların diqqətinə çatdırdı. Tədbirdə şagirdlərlə Mir Cəlal Paşayevin “Bir gəncin manifesti” romanından “İtə ataram, yada satmaram” əsəri üzrə diskussiya keçirildi. Diskussiya formasında keçən tədbirdə uşaqları maraqlandıran bütün suallar cavablandırıldı. Məktəblilərə yazıçının “Yuxu və külək”, Nizami Gəncəvinin “İsgəndərnamə” poeması əsasında yazılmış “İki rəssam” kitabları oxundu. Daha sonra, tədbir iştirakçılarına kitabxana haqqında geniş məlumat verildi. Sonda, kitab və kitabxananın əhəmiyyətini vurğulayan video material izlənildi.