22 fevral 2018-ci ildə F.Köçərli adına Respublika Uşaq Kitabxanasının 1 saylı filialı Yasamal rayon 176 saylı orta məktəbin şagirdləri ilə Xocalı soyqırımının 26-cı il dönümü ilə əlaqədar Azərbaycan Respublikası Hərbi Prokurorluğunun inzibati binasında fəaliyyət göstərən Memorial Soyqırım Muzeyinə ekskursiya etdilər. Hərbi Prokurorluğun Soyqırımı Muzeyi XX əsrin əvvəllərindən bəri erməni-bolşevik silahlı dəstələrinin Azərbaycan torpaqlarında həyata keçirdikləri kütləvi qırğınlar və soyqırımları nəticəsində həlak olan on minlərlə azərbaycanlının xatirəsinə həsr edilib. Muzey dörd bölmədən – tarix, deportasiyalar-repressiyalar, soyqırımları və terror bölmələrindən ibarətdir. Muzey Azərbaycan xalqına qarşı törədilmiş soyqırım, deportasiya, hərbi cinayətlər barədə xarici və Azərbaycan müəlliflərinin kitablarından ibarət zəngin kitab fondu ilə təchiz olunub. Muzeydə Xocalı, Qarabağ faciələri barədə sənədlər, erməni vəhşiliyinin bəzi qurbanlarının, bəzi milli qəhrəmanların şəxsi əşyaları, sənədləri, fotoları və s. əşyalar sərgilənir. Ekskursiya zamanı bələdçi muzey haqqında məlumat verib, Azərbaycan xalqının gələcək nəsillərinin qan yaddaşının qorunmasına və soyqırım qurbanlarının xatirəsinin əbədiləşdirilməsinə xidmət edən ağır bir tarixi hadisəni özündə əks etdirən nümunə olduğunu qeyd etdi. Muzeylə tanışlıqdan sonra şagirdlər Hərbi Prokurorluğunun sifarişi ilə hazırlanmış “Əsrin faciəsi” sənədli filmini izlədilər. Uşaqlar bir daha xalqımıza qarşı törədilmiş soyqırımı, cinayətləri, erməni vəhşiliyi, işğal zamanı həlak olmuş, ziyan çəkmiş insanlar barədə məlumatları əldə etdilər.