Martın 14- də, Firidun bəy Köçərli adına Respublika Uşaq Kitabxanası və Ukrayna Milli Uşaq Kitabxanası arasında “Sərhəd bilməyən incəsənət” lahiyəsi çərçivəsində “Milli geyimlər və folklor” adlı virtual görüş keçirildi. Tədbir, AMEA- nın Elmi Kitabxanasının Konfrans zalında baş tutdu. Layihə çərçivəsində keçirilən virtual görüşdə, Firidun bəy Köçərli adına Respublika Uşaq Kitabxanasının təşkilatçılığı ilə Azərbaycan Xalça Muzeyində lentə alınmış Azərbaycanın milli geyimlərinin tarixi və Qarabağ xalçaları haqqında geniş məlumat və görüntünü əks etdirən video-material təqdim edildi. Həmçinin Azərbaycanlı məktəblilər, Azərbaycanın milli rəqslərindən olan “Yallı”- nın yaranma tarixi və “Qarabağ Yallısı” adlı maraqlı rəqs kompozisiya ilə çıxış etdilər. Sonra uşaqlar, qədim “Aşıq yaradıcılığı” barədə məlumat verib aşıq sənətinin ən gözəl nümünələrini ifa etdilər. Görüş çərçivəsində, məktəblilər Azərbaycanın ənənəvi baş örtüyü sayılan “Kəlağayı” və folklorun ən geniş janrlarından biri “Bayatılar” haqqında geniş məlumatla  çıxış edib, folklorumuzu yüksək səviyyədə nümayiş etdirdilər. Novruz bayramı ərəfəsində keçirilən tədbirin əsas məqsədi, ölkə hüdudlarından kənardakı uşaq kitabxanaları ilə sıx əməkdaşlıq etməklə uşaqlara yeni dostlar qazandırmaq və hər iki ölkənin milli geyim və folkloru haqqında oxucuları məlumatlandırmaq idi. Tədbirin sonunda, kitabxananın direktor müavini Zahirə Dadaşova çıxış edərək, belə layihələrin uşaqların dünyagörüşünə müsbət təsirini vurğulayıb, əməkdaşlığa görə Ukrayna Milli Uşaq Kitabxanasına öz dərin minnətdarlığını bildirdi.