Fevralın 22-də “Şərq-Qərb” nəşriyyatının əməkdaşları - nəşr üzrə direktor müavini, nəşriyyat departamentinin müdiri Sevil İsmayılova və direktor müavini Rafiq Kazımov F.Köçərli adına Respublika Uşaq Kitabxanasının qonağı oldular. “Şərq-Qərb” Açıq Səhmdar Cəmiyyəti 1986-cı ildən etibarən fəaliyyət göstərir. Hazırda müəssisədə nəşriyyat və poliqrafiya sahəsində respublikamızda və xaricdə təhsil almış yüksək ixtisasa və böyük təcrübəyə malik mütəxəssislər çalışırlar. Müəssisə hər il ümumi tirajı 2 milyondan çox olan və müasir tələblərə cavab verən çap məhsulları istehsal edir. Nəşriyyat kitab nəşri ilə əlaqədar dəfələrlə yerli və beynəlxalq mükafatlara layiq görülmüşdür. Beynəlxalq və yerli sərgilərdə uğurla iştirak etmişdir. Dərc edilən kitabların yüksək poliqrafik səviyyəsi və keyfiyyəti oxucular tərəfindən yüksək qiymətləndirilmişdir. “Şərq-Qərb” nəşriyyatı gələcəyimiz olan uşaqların da dünyagörüşünün inkişaf etdirilməsi, müstəqil fikir yürütmək və nəticə çıxarmaq bacarıqlarının aşılanması baxımından bir çox kitablar çap etmişdir. “Şərq-Qərb” nəşriyyatının əməkdaşları kitabxananın bütün şöbələri ilə tanış oldular, çox böyük təəssüratla kitabxanadan ayrıldılar. Onlar kitabxana ilə əməkdaşlığın yalnız nəşriyyat üçün deyil, cəmiyyət üçün də faydalı olacağını bir daha vurğuladılar. Görüşün sonunda kitabxanaya 10 ədəd tarixi, publisistik və bədii kitablar hədiyyə etdilər. Qeyd edək ki, “Şərq-Qərb” nəşriyyatı 2013-cü ildə Mədəniyyət və Turizm Nazirliyinin sifarişi ilə uşaq folklor antalogiyasının banisi F.Köçərlinin 150 illik yubileyi münasibətilə “Balalara hədiyyə” kitabının 4-cü təkrar nəşrini çap etmişdir.