Bakı şəhəri Xətai rayonu 95 nömrəli məktəbinin 3-cü sinif şagirdləri, uşaq yazarı Sevinc Nuruqızı və Firidun bəy Köçərli adına Respublika Uşaq Kitabxanasının direktoru, Əməkdar mədəniyyət işçisi Şəhla Qəmbərova arasında Koronavirus (COVİD-19) infeksiyası ilə əlaqədar ölkə ərazisində xüsusi karantin rejiminin tətbiq olunduğu bu günlərdə onlayn görüş keçirildi. Kitabxananın əsas vəzifələrindən biri olan, istənilən şəraitdə uşaqları bütün imkanlardan istifadə edərək kitab və kitabxanın əhəmiyyətini vurğulamaq, onları daima mütaliəyə və kitab oxuyaraq inkişaf etməyə yönləndirmək baxımından olduqca vacibdir. Onlayn görüşün keçirilməsində əsas məqsəd Koronavirus (COVİD-19) infeksiyasının ölkə ərazisində yaratmış olduğu vəziyyətlə əlaqədar kitabxananın virtual xidmət göstərdiyi günlərdə oxucuları sosial şəbəkələr və digər informasiya saytları ilə yanaşı həmdə skyp vasitəsi ilə canlı görüşə çıxaraq onları saytdan düzgün istifadə qaydalarını izah etmək, uşaqları kitabxananın onlar üçün həyata keçirdiyi səmərəli layihələr barədə məlumatlandırmaq, həmçinin, evdə qaldıqları müddəti daha səmərəli və faydalı keçirmələri üçün maarifləndirici tövsiyyələr verməkdir. Görüş çərçivəsində Ş.Qəmbərova uşaqlara uşaq ədəbiyyatından, kitabxananın internet ünvanında edilən yeniliklərdən və onlardan düzgün istifadə qaydalarından eləcə də, karantın müddətində kitabxananın həyata keçirdiyi layihələr haqqında geniş məlumat verdi. Uşaq yazarı Sevinc Nuruqızınında iştirak etdiyi görüşdə uşaqlarla maraqlı diskussiyalar aparıldı. Uşaqları maraqlandıran bütün suallar ətraflı cavablandırıldı. Qeyd edək ki, onlayn görüşlərin digər oxucularla da keçirilməsi nəzərdə tutulub.