17 oktyabr tarixində F.Köçərli adına Respublika Kitabxanasında "Nağıl saatı" baş tutdu. "Nağıl saatı" nda uşaq yazarı Mehriban Nağıyeva ilə oxucular arasında görüş keçirildi.

Baş tutan ilk nağıl saatında Bakı şəhəri 60 nömrəli tam orta məktəbin 2 və 3- cü sinif şagirdləri iştirak etdilər.

Oxucularla görüşdə yazıçı  “Xarıbülbül və Günəşin nağılı”, “Lovğa tülkü”, “Dərdli kirpi” nağıllarını, hekayələrini, təmsillərini danışdı, “Qazlar”, “Şuşa”, “Gicitkən” və s. şeirlərini səsləndirdi.

Uşaqların müxtəlif suallarını cavablandıran Mehriban Nağıyeva oxucularla maraqlı disskusiyalar apardı.

Əsərlərinin  mövzularını real həyatdan götürən yazıçı uşaqlar üçün yazıb yaratmaqdan xoşbəxt olduğunu və bu əsərlərin ümumiyyətlə nağılların təsiri ilə böyüyən hər bir uşağın söz ehtiyatının zəngin və səlis nitqə malik olduğunu vurğuladı.

Görüşün sonunda müəllim və valideynlər "Nağıl saatı" nın təşkili üçün kitabxana kollektivinə və Mehriban Nağıyevaya öz minnətdarlıqlarını bildirdilər.

Qeyd edək ki, bu günə qədər yazıçının uşaqlar üçün yazdığı 11 kitabı  işıq üzü görüb. Mehriban Nağıyevanın qələmə aldığı nağıllar tərbiyəvi əhəmiyyətə malikdir və uşaqları yüksək mənəvi keyfiyyətlərə sahib olmağa səsləyir.

Əsas məqsəd kiçikyaşlı oxuculara tərbiyəvi təsir göstərməkdən ibarətdir. Belə ki, bədii əsərlərdəki obrazlar, psixoloji hallar, hadisələrin inkişafı uşaqların dünyagörüşünü genişləndirir.

Sonda uşaqların hər birinə yazıçının imzaladığı “Uşaqların şeir payı”, “Əsmərin sehrli zənbili”, "Ay Səni Tülkü Lələ" nağıl kitabları və kitabxana tərəfindən təsis edilən “Göy Qurşağı” uşaq jurnalları hədiyyə edildi.