18 №li tam orta məktəb və F.Köçərli adına Respublika Uşaq Kitabxanasının əməkdaşlığı çərçivəsində “21 fevral - Beynəlxalq Ana Dili Günü” adlı tədbir təşkil olundu.

18 fevral tarixində Bakı şəhər,Yasamal rayon M.Müşviq adına 18 №li tam orta məktəb və F.Köçərli adına Respublika Uşaq Kitabxanasının əməkdaşlığı çərçivəsində “21 fevral -Beynəlxalq Ana Dili Günü” adlı tədbir təşkil olundu. 

Tədbirdə kitabxananın əməkdaşı tərəfindən 4-cü sinif şagirdlərinə “Dədə Qorqud “və “Dədə Qorqud Kitabı” (ensiklopedik lüğət) haqqında ətraflı məlumat verilib. Təqdim olunan kitablarla bağlı şagirdlərlə birgə müzakirələr aparılıb. Müzakirə zamanı “Kitabi-Dədə Qorqud Ensiklopediyası” nda yer alan və hal-hazırda ədəbi dilimizdə işləkliyini itirmiş, arxaik və əski türk sözləri şagirdlərdə xüsusi marağa səbəb olub. Kitabxana əməkdaşı ensiklopediyadan istifadə qaydalarını şagirdlərə aşılayaraq, bu kimi sözlərin mənasının öyrənilməsində şagirdlərə köməklik göstərib. 

Həmçinin qeyd olunub ki, dünya folklorunun nadir incilərindən olan "Kitabi-Dədə Qorqud" dastanı Azərbaycan dilində yaranmış və ona böyük şöhrət və əbədiyaşarlıq qazandırmışdır. Məhz, bu səbəbdən azərbaycanşünaslıqda çoxları bu kitabı haqlı olaraq milli-etnik varlığımızın tarixi-ədəbi ensiklopediyası sayırlar.

Tədbirin keçirilməsində əsas məqsəd isə ana dilimizi qorumaq, yaşatmaq, dilimizin tarixini, incəliklərini və saflığını yeniyetmə və gənclərə çatdırmaqdır.