13 aprel 2022-ci il tarixində F.Köçərli adına Respublika Uşaq Kitabxanasında 15 aprel – Beynəlxalq Mədəniyyət Gününə həsr olunmuş tədbir keçirilib. Tədbirdə Bülbül adına Orta İxtisas Musiqi Məktəbinin , Kaspi Liseyinin şagirdləri, kitabxana əməkdaşları, oxucular və valideynlər iştirak edib. Tədbiri giriş sözü ilə açan kitabxana əməkdaşı İ.Abdullayeva bildirib ki, 15 aprel mədəniyyət təqviminin əlamətdar günlərindən biridir 1935-ci il aprelin 15-də Vaşinqtonda 21 ölkənin başçıları tərəfindən tarixdə ilk dəfə olaraq yaradıcısının şərəfinə Rerix Paktı adlanan “Mədəniyyət, elm və incəsənətin məqsədlərinə xidmət edən müəssisələrin, həmçinin tarixi abidələrin qorunması haqqında” beynəlxalq müqavilə imzalanıb.  1998-ci ildə “Mədəniyyətin müdafiəsi beynəlxalq liqası” adlı ictimai təşkilat bu tarixin “Beynəlxalq mədəniyyət günü” kimi qeyd olunması təşəbbüsü ilə çıxış edib. Həmin tarixdən 15 aprel bir sıra ölkələrlə bərabər bizim ölkəmizdə də qeyd olunur.

Tədbirdə musiqi məktəbinin şagirdlərinin ifasında konsert proqramı təqdim edilib. Uşaqların tar və fortepianonun müşaiətində ifa etdikləri Həsən Rzayevin “Cahargah” rapsodiyası, Tofiq Quliyevin “Kəndimiz”, Sergey Prokofiyevin “Marş” və s. musiqi nömrələri tədbir iştirakçılarının marağına səbəb oldu.

Tədbirdə iştirak edən uşaqlara kitabxananın təsis etdiyi “Göyqurşağı” jurnalı hədiyyə edildi. Sonda xatirə şəkilləri çəkildi.