Vətən Müharibəsi Şəhidi, tank komandiri, leytenant şair Murad Nağıyevin həyatından, döyüş yolundan və şeirlərindən bəhs edən “Murad” adlı kitab şəhidimizin ailə üzvləri tərəfindən kitabxanaya təqdim olunmuşdur.

 “Murad” adlı kitabda 44 günlük Vətən müharibəsində misilsiz qəhrəmanlıqlar göstərən şəhid leytenant, tank komandiri, şair Murad Nağıyevin keçdiyi həyat və döyüş yolundan bəhs olunur. Kitab “Ön Söz”ündən tutmuş “Son Söz”ünə qədər sətir-sətir, duyğu-duyğu, məna-məna qəhrəman, gənc və istedadlı şair Murad Nağıyevin öz taleyidir. Şəhidin həyat və döyüş yolundan bəhs edən, ailəsinin, dostlarının, döyüş yoldaşlarının, müəllimlərinin onunla bağlı xatirələrini bölüşdüyü kitabda, həmçinin, Murad Nağıyevin müəllifi olduğu şeirləri, xüsusilə də cəbhədə olarkən qələmə aldığı sətirləri əks olunub. Müharibənin ilk günündən döyüşə yollanan Murad Nağıyev Horadiz kəndinin alınmasında şücaət göstərmiş, Füzuli, Cəbrayıl, Hadrut və Zəngilanın düşmən işğalından azad edilməsində fəal iştirak edərək düşmənin strateji əhəmiyyətli obyektlərini, çoxsaylı texnikasını və canlı qüvvəsini məhv etmişdir. 

Murad Nağıyev 11 oktyabr 2020- ci ildə Cəbrayıl uğrunda gedən döyüşlərdə şəhid olmuşdur. İkinci Fəxri xiyabanda dəfn olunan şəhid leytenant Murad Nağıyev vəfatından sonra “Vətən uğrunda” və “Cəbrayılın azad olunmasına görə” medalları ilə təltif olunmuşdur.