26 may tarixində F.Köçərli adına Respublika Uşaq Kitabxanası və Nəsimi rayonu N.Axundov adına 1 №-li tam orta məktəbin təşkilatçılığı ilə  “Səndə vardır başqa lətafət, Şuşa! – 270” və “Xurşidbanu Natəvan - 190” illiyinə həsr olunmuş tədbir keçirildi. Məktəbin foyesində Şuşa ilinə həsr olunmuş məlumat-informasiya guşəsi və kitab sərgisi, şagirdlərin Şuşaya aid rəsm və əl işləri nümayiş olunmuşdu. Azərbaycan dövlət himninin səsləndirilməsi ilə tədbir başladı, daha sonra Vətənimiz uğrunda canlarını qurban vermiş şəhidlərimizin ruhu bir dəqiqəlik sükutla yad edildi. 

Tədbirdə Nəsimi rayon İcra Hakimiyyəti başçısının birinci  müavini, Nəsimi rayon Yeni Azərbaycan Partiyasının nümayəndəsi, Bakı şəhəri Təhsil İdarəsinin nümayəndələri, ümumi şöbənin  və ictimai əlaqələr şöbəsinin əməkdaşları,  qazilər və şəhid uşaqları iştirak edirdi. Məktəblilərin ifasında Şuşa haqqında söylənilən şeirlər, ədəbi-bədii kompozisiyalar, gözəl rəqslər tədbirə xüsusi rəng qatdı. Tədbirdə şəhid övladı - İsgəndərli Abbas Ərizamin oğlu çıxış edərək atasının döyüş yolundan, igidliyindən və eləcə də atası ilə bağlı xatirələrindən söhbət açdı. Tədbir iştirakçıları kitab sərgiləri və əl işləri ilə yaxından tanış oldular. Tədbirin sonunda xatirə şəkilləri çəkildi.