4 may tarixində Firidun bəy Köçərli adına Respublika Uşaq Kitabxanasında yazıçı Solmaz Amanovanın Y.Kovalyov adına 229 saylı orta məktəb şagirdləri ilə görüşü keçirilib.

Görüş zamanı yazıçı  məktəblilərə “Şuşanın sehrli açarları”,  “Cəsur ayı və dostları”,  “İlmənin macəraları” və müəllifi olduğu digər kitablar haqqında ətraflı məlumat verib. Yazıçı oxuculara Azərbaycan  xalqının şanlı tarixi, vətən uğrunda qəhrəman övladlarımızın apardığı mübarizələr, qədim diyarımız Qarabağ, mədəniyyət beşiyimiz Şuşa, daim torpaqlarımıza göz dikmiş erməni quldurları haqqında məlumat verərək bildirib ki, biz düşmənimizi heç zaman unutmamalı, daim vətənimizin müdafiəsi, azadlığı, çiçəklənməsi üçün güclü olmalı, bu ənənəni nəsillərdən-nəsillərə ötürməliyik. 

Yazıçı həmçinin, müəllifi olduğu kitabların elektron versiyasını, əsərlərinə çəkilmiş animasiyaları və kitabları əsasında hazırlanmış interaktiv oyunları oxuculara təqdim edib.

Görüşün sonunda məktəblilər müəllifin sözlərinə bəstələnmiş mahnını ifa edib.

Tədbirin keçirilməsində  əsas məqsəd oxucuları  yazıçılarla tanış etmək, onların mütaliə mədəniyyəti və oxu vərdişini formalaşdırmaq, uşaq kitabları vasitəsilə mütaliə anlayışını təşviq etməkdir.