14 fevral - Beynəlxalq Kitab Bağışlama Günüdür. Bu gün uşaqlara kitab bağışlayan və onlarda kitaba sevgi yaradan bütün insanları birləşdirir. 2012- ci ildən qeyd edilən bu bayram ABŞ-da məşhur “Delightful  Children’s Books” uşaq kitabı saytının yaradıcısı Emmi Brodmoorun adı ilə bağlıdır. Bu bayram İngiltərədə qeyd olunsa da, dünyanın hər yerindən kitabsevərlər hər il bu bayramlara qatılırlar.

14 fevral tarixində Beynəlxalq Kitab Bağışlama Günü münasibətilə F.Köçərli adına Respublika Uşaq Kitabxanasının təşkilatçılığı,  Azərbaycan Kitab, Maarif və Poliqrafçılar İB-nin dəstəyi ilə bir qrup əməkdaş və uşaq yazarı Sevinc Nuruqızı 1 saylı Uşaq Evini ziyarət ediblər. Uşaq evini ziyarət edən qonaqlar buranın  balaca sakinlərinin əl işləri,rəsmləri və sənətkarlıq işləri ilə yaxından tanış olduqdan sonra uşaqların təqdimatında hazırlanmış rəqslərə baxıblar. Daha sonra uşaq yazarı Sevinc Nuruqızı ilə uşaqlar arasında maraqlı görüş baş tutub. Görüşün sonunda Respublika Uşaq Kitabxanası və AKMP İB-i tərəfindən  uşaqlara müxtəlif yaş qruplarına dair kitablar hədiyyə edilib. Ümumilikdə 1 nömrəli Uşaq Evinə 275 nüsxə kitab və “Göyqurşağı” uşaq jurnalı hədiyyə edilib. F.Köçərli adına Respublika Uşaq Kitabxanası 2014- cü ildən hər il “Beynəlxalq Kitab Bağışlama Günü” münasibəti ilə müxtəlif məkanlarda 100-lərlə kitab hədiyyə etməklə uşaqları sevindirməyə davam edir.  Keçirilən bu tədbirin əsas məqsədi gənc nəsildə kitaba sevgi hissi yaratmaq, mütaliə mədəniyyətinin formalaşmasında kitabın mühüm əhəmiyyətini diqqətə çatdırmaqdan ibarətdir. Gəlin biz çox sevdiyimiz bu kitabları başqalarına verməyə və onların həyatına kiçik pəncələr açmağa addım ataq!  

Beləliklə, uşaqlarda kitaba məhəbbət yaranır, böyüklərdə isə bağışlamaq, hədiyyə etmək sevinci formalaşır.