5 oktyabr tarixində 10-cu Beynəlxalq Kitab Sərgisində Respublika Uşaq Kitabxanası və “Nərmin Yayın Evi”nin birgə təşkilatçılığı ilə yazıçı Zahirə Cabirin  uşaqlar üçün yazdığı “Təbiətin nağılı” adlı kitabının təqdimatı baş tutub.

Tədbir 189-190 nömrəli tam orta məktəbin 3-cü sinif şagirdlərinin təqdimatında nağıl qəhrəmanları olan Məlik Məmməd, Göyçək Fatma, Tıq-tıq xanım, Xoruz, Cik-cik xanım, Siçanqulu bəy və Torpaq obrazlarının təbiətlə bağlı fikirlərini əks etdirən bədii kompozisiya ilə başlanıb. Daha sonra məktəblilər təbiətlə bağlı qısa anotasiyalı məlumatlar səsləndiriblər. Çıxış edənlər həmçinin qeyd ediblər ki, Vətənimizin zəngin təbiəti xalqımızın sərvətidir. Ona görə də Vətənin təbiətini qorumaq, mühafizə etmək, onun flora və faunasına can yandırmaq hər bir vətəndaşın borcudur.

Yazıçı Zahirə Cabir çıxışına tədbirə gələn qonaqları salamlamaqla başlayıb və qeyd edib ki, “Hazırda ekoloji tarazlığın qorunması, ətraf mühitin mühafizəsi, iqlim dəyişiklikləri ən aktual mövzulardandır. Həmçinin yazıçı qeyd edib ki, kitabda təbiət haqqında 10 hekayə yer alıb.

“Təbiətin nağılı” adlı kitabda gözəl rəsmlərlə işlənmiş maraqlı hekayələr verilmişdir. Təbiət öz nağılları ilə bizə nə demək istəyir? Təbiəti qorumaq üçün nə etməliyik? Əgər təbiətin nizamı pozularsa, nələr baş verər? Sizcə, bu nizamın pozulmasının qarşısını almaq olarmı? Bu suallar cavabı “Təbiətin nağılı” kitabını oxumaqla biləcəksiniz. 

Tədbir “Lalə Məmmədova - Təbiəti qoruyaq” mahnısının sədaları altında məktəblilərin rəqsi ilə başa çatıb.