23 aprel 2025-ci il tarixində F.Köçərli adına Respublika Uşaq Kitabxanasında “Ümumdünya Kitab və Müəlliflik Hüququ Günü” münasibətilə tədbir keçirilib. Kitablara və müəlliflərə ehtiram məqsədi ilə təsis olunan “Beynəlxalq Kitab və Müəllif Hüquqları Günü” həm də hamını, xüsusilə də gəncləri mütaliədən zövq almağa, bəşəriyyətin sosial və mədəni inkişafında əməyi olmuş sənətkarların əvəzsiz irsinə hörmətlə yanaşmağa çağırış günüdür. Hər bir yaradıcı insanın öz əsərinə müəllif hüququ vardır. Bu, vətəndaş hüququnun elm, ədəbiyyat, incəsənət əsərlərinin yaradılması və sonrakı fəaliyyəti ilə əlaqədar münasibətlərini tənzimləyən bir bölməsidir və müəllif hüquqlarının qorunması ilə bağlı beynəlxalq konvensiyalarla tənzimlənir.

Tədbirdə uşaq yazarı Zahirə Cabirlə 283 nömrəli tam orta məktəbin şagirdlərinin görüşü keçirilib. Yazıçı uşaqlara “Əvvəl zaman içində”, “Böyük Azərbaycanlı” və “Təbiətdən gələn məktub” adlı kitablarını təqdim edərək hər biri haqqında qısa annotasiya məlumatı verib. Sonra məktəblilərə Azərbaycanın şifahi xalq ədəbiyatının janrlarından - qaravəlli haqqında ətraflı danışıb. Yazar “Təbiətin nağılı” kitabından bir neçə nağıl səsləndirib, suallar ünvanlayıb. Məktəblilər arasında suallara doğru cavab verən şagirdlərə müəllifin imzalı kitabı hədiyyə edilib. 

Tədbir zamanı məktəblilər şeirlər səsləndirib, “Şuşanın dağları” mahnısını birgə ifa ediblər. Sonda uşaqlara kitabxananın təsis etdiyi “Göy Qurşağı” uşaq jurnalı, müxtəlif növ əlfəcinlər hədiyə edilib.