10-16 fevral 2025-ci il tarixlərində 57, 74, 95, Həbibulla Hüseynov adına 83 nömrəli məktəbin 1-ci, 3-cü və 6-cı sinif şagirdlərinin Respublika Uşaq Kitabxanasına ekskursiyası təşkil edilib. Kitabxana əməkdaşları uşaqlara kitabxananın tarixi, fəaliyyəti və kitab fondu barədə ətraflı məlumat verib. Şagirdlər müxtəlif mövzularda olan kitablarla tanış olublar, onlara maraqlı nağıl və hekayələr oxunub. Həmçinin məktəblilər kitabxananın oxu zalında sevdikləri bədii, tarix, coğrafiya, idman və digər ədəbiyyat nümunələri ilə tanış olublar. 

Şagirdlərə “Mənim ilk bilgilər kitabım: Bədənim”, “İnsan Bədəni” və “Niyə səma mavidir?” kitablarının icmalı təqdim edilib. Kitabda verilən mövzular - insan orqanizminin quruluşu, orqanların funksiyaları və sağlam həyat tərzi barədə maraqlı faktlar, səmanın rəngi, işıq dalğaları və atmosferin təsiri haqqında məlumatlar müzakirə edilib.

Həmçinin “Teatr və Kino, həyatın hər iki üzü”, “İdman güc və gözəllik”, “Okean bəşərin beşiyi”, “Yer kürəsi – planetimiz olduğu kimi” kitablarının müzakirəsi baş tutub. Sonra onlar görkəmli ədəbiyyatşünas və tənqidçi Firidun bəy Köçərlinin həyat və yaradıcılığına həsr olunmuş slaydı izləyiblər. Tədbir şagirdlərin dünyagörüşünü artırmaq və mütaliəyə marağını daha da gücləndirmək məqsədi daşıyır.

Sonda kitabxananın təsis etdiyi “Göy Qurşağı” adlı jurnal məktəbin kitabxansına hədiyyə edilib.