18 fevral 2025-ci il tarixində Dövlət Tibbi-Sosial Ekspertiza və Reabilitasiya Agentliyinin 2 nömrəli Uşaq Reabilitasiya Mərkəzində "Uğur" tədris mərkəzinin və F.Köçərli adına Respublika Uşaq Kitabxanasının 2 saylı filialının birgə təşkilatçılığı ilə “21 Fevral - Beynəlxalq Ana Dili Günü”nə həsr olunmuş "Mənim ana dilim" adlı tədbir keçirilib və ənənəvi ibarət sərgi təşkil olunub.

Tədbir Dövlət Himninin səsləndirilməsi ilə başlayıb. Kitabxana əməkdaşları Ana dilinin əhəmiyyəti, inkişaf yolu haqqında ətraflı məlumat verib. Qeyd olunub ki, milli mənəviyyatımızı, milli varlığımız olan dilimizi xalqımız həmişə müqəddəs bilmiş, bütün tarixi dönəmlərdə göz bəbəyi kimi qorumuş, bu günədək saxlamış və inkişaf etdirmişdir. "Uğur" Tədris Mərkəzinin rəhbəri ana dilimizin zənginliyindən, inkişaf səviyyəsindən bəhs edib. Şagirdlər ana dili ilə bağlı şeirlər səsləndirib, "Öz dilimizdə danışaq" şüarı ilə çıxışlarını təqdim ediblər. Reabilitasiya mərkəzinin uşaqlarının ifasında rəngarəng mahnı və rəqs töhfələri nümayiş olunub. Kitabxana əməkdaşları uşaqları sərgidəki kitablarla tanış etdikdən sonra onları hədiyyələrlə sevindirib. 

Sonda hamılıqla "Şirin dil" mahnısı ifa edilib. 

Tədbirin keçirilməsində məqsəd inklüzivliyin təbliği, fiziki məhdudiyyətli uşaqların digər uşaqlarla birgə fəaliyyətini təmin etmək, onların sosiallaşmasına, öz bacarıqlarını nümayiş etdirməsinə dəstək olmaq, kitaba və təhsilə olan maraqlarına dəstək olmaqdır.