14 yanvar 2024-cü il tarixində 28 nömrəli tam orta məktəbin şagirdlərinin F.Köçərli adına Respublika Uşaq Kitabxanasına ekskursiyası təşkil olunub. Ekskursiya zamanı məktəblilər Respublika Uşaq Kitabxanası ilə tanış olub, şifahi xalq ədəbiyyatını və müasir uşaq yazarlarının əsərlərindən nümunələri müzakirə ediblər.

Həmçinin kitabxananın oxu zalında məktəblilərlə tanınmış şair, ədəbiyyatşünas, Azərbaycan Respublikasının Əməkdar mədəniyyət işçisi, ədəbi mükafatlar laureatı, yazıçı Rafiq Yusifoğlunun “Yollar” adlı kitabının icmalı keçirilib. Kitabxananın əməkdaşları tərəfindən R.Yusifoğlunun həyat və yaradıcılığı haqqında ətraflı məlumat verilib, uşaq ədəbiyyatı və Azərbaycan ədəbiyyatşünaslığında Rafiq Yusifoğlunun xidmətlərindən danışılıb.

Uşaq ədəbiyyatı Rafiq Yusifoğlunun yaradıcılığının ən aparıcı qollarından biridir. Onun indiyədək orta məktəb dərsliklərinə düşən əsərlərinin biblioqrafik göstəricisi üç yüzü adlayıb. Rafiq Yusifoğlunun uşaq psixologiyasına yaxından bələd olması, uşaq ədəbiyyatı ilə bağlı bir sıra beynəlxalq tədbirlərdə iştirakı onun bu sahədə uğurlar qazanmasına səbəb olub. Şairin uşaqlar üçün qələmə aldığı şeirləri digər ölkələrdə də çap olunub, rəğbətlə qarşılanıb.

Ekskursiyaların təşkil olunmasında əsas məqsəd uşaqları Respublika Uşaq Kitabxanası ilə yaxından tanış etmək, onların kitaba olan marağını artırmaqdır.