20 fevral 2025-ci il tarixində F.Köçərli adına Respublika Uşaq Kitabxanasında “Yeniyetmə və keçid” layihəsi çərçivəsində “Uşaq hüquqları və Uşaqların Sosial müdafiəsi” adlı tədbir keçirilib. Layihənin “Dialoq və ünsiyyət” rubrikasına aid olan tədbir “Konstitusiya və Suverenlik İli”nə həsr olunub. Tədbirdə 193 nömrəli tam orta məktəbin yuxarı sinif şagirdləri, müəllim heyəti, həmçinin kitabxana əməkdaşları iştirak edib. 

Tədbirdə kitabxana əməkdaşı uşaqları “Uşaq hüquqları haqqında” Azərbaycan Respublikasının Qanunu ilə tanış edib, onlara bulinq haqqında geniş məlumat və mövzu ilə əlaqədar resursları əhatə edən prezentasiya təqdim edib.

Həmçinin qeyd edilib ki, “Məktəbdə müəllimləriniz və yoldaşlarınızla qarşılıqlı hörmətlə davranmaq, nizam qaydalarına riayət etmək həm sizin, həm də digər uşaqların hüquqlarının qorunmasına kömək edir. Məktəbdəki qaydalar hamınızın daha yaxşı təhsil alması və təhlükəsiz şəraitdə olmağınız üçün vacibdir. Prezentasiyanın təqdim edilməsində məqsəd sizə hüquqlarınızı öyrətmək və onları məsuliyyətlə istifadə etməyinizə dəstək olmaqdır. Çünki hüquqların istifadəsi ilə yanaşı, məsuliyyət daşımaq da önəmlidir. O cümlədən sosial çevrənizdə bulinqə məruz qalsanız qarşısını almaq məqsədi ilə bu situasiyanı güvəndiyiniz böyüklərlə bölüşərək müdafiə hüququnuzdan istifadə edə bilərsiniz.”

Tədbirin davamında yeniyetmələr və gənc kitabxanaçılar arasında dialoq və ünsiyyət mövzusunda maraqlı müzakirələr aparılıb. Sonda isə kitabxana tərəfindən şagirdlərə “Göy Qurşağı” uşaq jurnalı hədiyə edilib.

Tədbirin məqsədi, uşaqların bulinqə dair məlumatlılığını artırmaq, hüquqları və düzgün ünsiyyət qurmaqla bağlı maarifləndirməkdır.