4 noyabr 2025-ci il tarixində  Dövlət Tibbi-Sosial Ekspertiza və Reabilitasiya Agentliyinin 2 nömrəli Uşaq Reabilitasiya Mərkəzi və Respublika Uşaq Kitabxanasının 2 saylı filialı birgə əməkdaşlıq çərçivəsində “Zəfərin mübarək, Azərbaycan!” adlı tədbir təşkil edib. Tədbirdə həmçinin ənənəvi kitab sərgisi də təqdim olunub.

Təşkil olunan tədbirdə mərkəzin kollektivi, Bülbül adına orta ixtisas musiqi məktəbinin müəllim və şagird heyəti, qonaqlar, kitabxana əməkdaşları və kiçik yaşlı oxucular iştirak ediblər. 

Öncə  Azərbaycan Respublikasının Dövlət Himninin səsləndirilib, daha sonra Vətən uğrunda canlarını fəda etmiş şəhidlərin xatirəsi bir dəqiqəlik sükutla yad edilib. Çıxış edənlər Azərbaycan Konstitusiyasının xalqımızın azad iradəsinin ifadəsi, dövlətimizin suverenliyinin isə hüquqi təməli olduğunu vurğulayıblar. Həmçinin 44 günlük Vətən müharibəsinin tarixi əhəmiyyəti qeyd olunub, Müzəffər Ali Baş Komandanın rəhbərliyi ilə qazanılan Şanlı Zəfərin Azərbaycan tarixində qürur səhifəsi kimi yer aldığı bildirilib. 

Tədbirdə şagirdlərin təqdimatında səslənən vətənpərvərlik ruhunda şeirlər, musiqi nömrələri və qəhrəmanlıq mahnıları iştirakçılara duyğulu anlar yaşadıb. Kitabxana əməkdaşları sərgidə nümayiş olunan ədəbiyyat barədə iştirakçılara məlumat təqdim ediblər. 

Tədbirin əsas məqsədi xüsusi qayğıya ehtiyacı olan uşaqların sosiallaşmasına, onların cəmiyyətin fəal üzvü kimi formalaşmasına, fərdi qabiliyyət və maraqlarına uyğun fəaliyyət göstərmələrinə dəstək olmaqdır.