12 fevral 2025-ci il tarixində Respublika Uşaq Kitabxanasında “Yeni kitablarla tanış olaq” rubrikası çərçivəsində gənc kitabxanaçılar üçün icmal saatı keçirilib. İcmalda uşaq yazarı Fatimə Alxazın “Buku, Qaranlıq və Toki”, “Bu kitabı qıdıqla, sığalla, alqışla”, Yuliya Kərimovanın “Mavi pişik, bulud və Cumbulu”, həmçinin yazıçı Elxan Elatlının “Şantaj”, “Susan qadın” adlı kitabları haqqında geniş məlumat verilib

Məktəbəqədər yaş dövrü üçün nəzərdə tutulmuş bu kitablarda şəkillərə daha çox üstünlük verilib. Şəkilli kitablar uşağın inkişaf dövründə nitq və ünsiyyət bacarıqları ilə yanaşı, xəyal dünyasını, yaradıcılıq qabiliyyətini də inkişaf etdirir. Uşaqlar üçün şəkilli kitablar vizual cəlbedicidir, bu da oxumağa daha çox həvəs yaradaraq, kitablara olan marağı artırır, gələcəkdə daha çox oxuma vərdişini formalaşdırmağa kömək edir. Şəkilli kitablar uşaqların intellektual və emosional inkişafına böyük töhfə verir və onları öyrənmək, kəşf etmək və müsbət vərdişləri inkişaf etdirmək üçün təbliğ edir.

Yazıçı Elxan Elatlının “Şantaj”, “Susan qadın” adlı kitabları isə valideynlər və digər böyük yaş qrupu oxucular üçün nəzərdə tutulub. Yazıçının əksəriyyəti detektiv süjet üzərində qurulmuş romanlarında vətənpərvərlik, müxtəlif xarakterli insanların psixologiyası və həyata baxışı mövzuları əsas yer tutur.

Kitab icmallarının əsas məqsədi, bir kitabın əsas məzmununu, ideyalarını və mövzularını qısa və aydın şəkildə təqdim etmək, həmçinin oxuculara kitab haqqında ümumi bir fikir vermək və onlara kitabın nə dərəcədə maraqlı və ya uyğun olduğunu müəyyən etməyə kömək etmək üçündür.