1 mart 2026-cı il F.Köçərli adına Respublika Uşaq Kitabxanasında 220 nömrəli tam orta məktəbin I sinif şagirdləri üçün “Ucadan Oxu Günü”nə həsr olunmuş maarifləndirici tədbir təşkil olunub. Tədbirin əsas məqsədi birinci sinif şagirdlərində mütaliəyə maraq oyatmaq, ana dilinə sevgi aşılamaq, vətənpərvərlik hisslərini gücləndirmək və onların dünyagörüşünün erkən yaşlardan inkişafına dəstək olmaq olub.

Tədbir zamanı kitabxana əməkdaşı “Balalara Hədiyyə” kitabının tərtibçisi Firidun bəy Köçərli haqqında ətraflı məlumat verib. Qeyd olunub ki, O, Azərbaycan dilinin inkişafında, uşaqlar üçün ilk folklor antalogiyasının yaradılmasında və milli maarifçiliyin formalaşmasında mühüm rol oynayıb.

“Ucadan Oxu Günü” ilə əlaqədar olaraq şagirdlər ana dilinə və vətənə həsr olunmuş, eləcə də şəhidlərin xatirəsinə ithaf edilmiş şeirlər səsləndiriblər. Uşaqlar kitabxananın kiçik oxucular zalında yeni nəşrlərlə tanış olub, öyrədici pazllar və inkişafetdirici qurma oyunları vasitəsilə həm əylənib, həm də bacarıqlarını inkişaf etdiriblər.

Tədbir balacaların böyük marağı və fəallığı ilə yadda qalıb.