F.Köçərli adına Respublika Uşaq Kitabxanasının Məlumat-Biblioqrafiya şöbəsi tərəfindən hazırlanmış  veblioqrafiya, Türkoloji fikir tarixində mühüm mərhələ təşkil edən qurultayın elmi və tarixi əhəmiyyətini hərtərəfli şəkildə işıqlandırır.

Elektron resursda Birinci Türkoloji Qurultayın yaranma tarixi, fəaliyyət istiqamətləri və elmi-mədəni mühitə təsiri geniş və sistemli şəkildə təqdim edilir. Veblioqrafiya çərçivəsində qurultayın ümumi icmalı, iştirakçı heyətin tərkibi, müzakirə olunan əsas problemlər və səsləndirilmiş elmi məruzələrin xülasələri ətraflı şəkildə öz əksini tapmışdır. Bununla yanaşı, qurultayın yekun nəticələri, qəbul olunmuş qərarların elmi ictimaiyyət tərəfindən qiymətləndirilməsi və sonrakı dövrlərə təsiri də xüsusi diqqət mərkəzində saxlanılmışdır.

Resursda həmçinin tanınmış alim və ictimai xadimlərin qurultayla bağlı dəyərli fikirləri, rəsmi sənədlər, fotoqalereya və müxtəlif vizual materiallar təqdim olunur. Veblioqrafiyada qurultaya həsr olunmuş 14 adda kitabın və 78 adda dövri mətbuat materialının tammətnli biblioqrafik təsvirləri tədqiqatçılar üçün etibarlı və zəngin mənbə bazası formalaşdırır.

Hazırlanmış elektron resursun əsas məqsədi Birinci Türkoloji Qurultayın 100 illik yubileyinin elmi və mədəni əhəmiyyətini geniş auditoriyaya çatdırmaq, bu istiqamətdə aparılan tədqiqatlara töhfə vermək və tarix, dilçilik, eləcə də mədəniyyət sahələrinə maraq göstərən oxucular üçün dəyərli informasiya platforması yaratmaqdır.

Virtual oxucular üçün nəzərdə tutulmuş vebloqrafiya, milli elmi irsin qorunması və təbliği baxımından mühüm  olmaqla yanaşı, Türkoloji düşüncənin inkişaf yoluna bir daha işıq salır və gələcək nəsillər üçün sanballı istinad mənbəyi rolunu oynayır.