Fevralın 26-da Xocalı soyqırımının 34-cü ildönümü ilə əlaqədar Respublika Uşaq Kitabxanasında Bakıda fəaliyyət göstərən Ankara liseyi şagirdlərinin iştirakı ilə anım tədbiri keçirilib.
“Xocalı faciəsi gənclərin yaddaşında” adlı tədbir Azərbaycan Respublikası Dövlət Himninin səsləndirilməsi və faciə qurbanlarının xatirəsinin bir dəqiqəlik sükutla yad edilməsi ilə başlayıb.
Uşaq yazarı Gülzar İbrahimova Xocalı soyqırımı haqqında məlumat verib, bu faciənin xalqımızın tarixində və milli yaddaşında dərin iz saldığını bildirib. O, mövzuya həsr etdiyi şeirini səsləndirərək uşaqlara sülhün, mərhəmətin və vətən sevgisinin əhəmiyyətini çatdırıb.
Daha sonra məktəblilər “Mən Xocalıyam” şüarı altında faciəyə həsr olunmuş şeirlər səsləndiriblər. Şeirlərdə vətənə bağlılıq, həmrəylik və gələcəyə ümid motivləri xüsusi yer alıb.
Sonda şagirdlər birlikdə “Çəkil torpağımdan, ey yağı düşmən” mahnısını ifa ediblər.
