23 Aprel tarixində  F.Köçərli adına Respublika Uşaq Kitabxanasında növbəti “Müəllif saatı” təşkil olunub. Layihə çərçivəsində Azərbaycanın görkəmli ictimai-siyasi xadimi, xalq şairi Sabir Rüstəmxanlı ilə XXI Əsr Beynəlxalq Təhsil və İnnovasiya Mərkəzinin 7-ci sinif şagirdlərinin görüşü keçirilib.  Tədbiri giriş sözü ilə açan kitabxananın direktoru Şəhla Qəmbərova qonaqları salamlayaraq, Sabir Rüstəmxanlının Azərbaycan ədəbiyyatındakı xüsusi mövqeyindən bəhs edib. Sabir Rüstəmxanlı öz növbəsində kitabxananın fəaliyyətini yüksək qiymətləndirərək, burada yaradılan mühitdən məmnunluğunu ifadə edib. Şair qeyd edib ki, kitabla dostluq edən gənclik Azərbaycanın parlaq gələcəyinin təminatıdır. Şagirdlər şairin həyat yolu, yaradıcılığı və əsərlərinin yaranma tarixi ilə bağlı suallar ünvanlayıblar. Sabir Rüstəmxanlı sualları cavablandırarkən tarixi romanlarından bəhs edib və bu əsərlərin əhəmiyyətini gənclərin diqqətinə çatdırıb. “Göy Tanrı”, “Difai fədailəri” , “Ölüm zirvəsi” kitablarında bəhs edərək bizim tariximiz qəhrəmanlıqlarla dolu olduğunu vurğulayıb. “Göy Tanrı” ilə köklərimizi, “Difai fədailəri” ilə milli müqavimət ruhumuzu, “Ölüm zirvəsi” ilə isə fədakarlığımızı dərk etməliyik.

Mərkəzin şagirdləri “Ümumdünya Kitab və Müəllif Hüquqları Günü”nə həsr olunmuş viktorina keçiriblər. Bu hissə gənclərin intellektual səviyyəsini və kitaba marağını nümayiş etdirib. Tədbir sual-cavab mərhələsi ilə yekunlaşıb, sonda isə uşaqlar bir-birinə kitab hədiyyə ediblər.

Tədbirin məqsədi şagirdlərdə kitaba, canlı ədəbiyyata və kitabxanaya olan marağı yenidən canlandırmaq, mütaliəni bir vərdişə çevirməkdir.