29 aprel 2026-cı il tarixində Naxçıvan Muxtar Respublikası Mədəniyyət Nazirliyinin tabeliyində olan kitabxanaların əməkdaşları peşəkarlıq səviyyəsinin daha da artırılması, müvafiq sahə üzrə qabaqcıl təcrübənin və müasir metodların öyrənilməsi məqsədi ilə F.Köçərli adına Respublika Uşaq Kitabxanasında olublar.

Təcrübə proqramına Naxçıvan Muxtar Respublikası Mədəniyyət Nazirliyinin kitabxana işi üzrə baş məsləhətçisi Aygün Heydərli, M.S.Ordubadi adına Naxçıvan MR Kitabxanasının direktoru Tamella Əsgərova, həmin kitabxananın Kitabsaxlama şöbəsinin müdiri Xurşud Budaqova,  A.Babayev adına Naxçıvan MR Uşaq Kitabxanasının Kitabsaxlama şöbəsinin müdiri Nazlı İsayeva, kataloqlaşdırma və kitabişləmə üzrə kitabxanaçı Əsmər Əliyeva  və Oxuculara xidmət şöbəsinin müdiri Aytən Qurbanova, Naxçıvan Şəhər MKS-in direktoru Minayə Nəbisoy, Şərur Rayon MKS-dən Komplektləşdirmə və kitabişləmə şöbəsinin müdiri Gövhər Məmmədova, Ordubad Rayon MKS-dən Multimedia mütəxəssisi Günay Şəfiyeva və Kəngərli Rayon MKS-dən böyük kitabxanaçı Samirə Məmmədova iştirak ediblər.

Təcrübə müddətində, həmçinin mütəxəssislər kitabxana-informasiya xidmətlərinin təşkili, elektron kataloq sistemləri ilə iş, fondun idarə olunması, kitabların elektron sistemə daxil edilməsi, həmçinin uşaqlara yönəlmiş maarifləndirici layihələrin hazırlanması prosesini müşahidə ediblər. 

Belə təcrübə proqramları kitabxanaçılar arasında qarşılıqlı təcrübə mübadiləsinə şərait yaratmaqla yanaşı, regionlararası əməkdaşlığın möhkəmləndirilməsi baxımından da əhəmiyyətlidir. Eyni zamanda, bu cür təşəbbüslər müasir dövrdə kitabxanaların sosial-mədəni mərkəz kimi fəaliyyət göstərməsi üçün zəruri bilik və bacarıqların inkişafına mühüm töhfə verir.

Sonda iştirakçılar təcrübə proqramlarının mütəmadi keçirilməsinin vacibliyini qeyd etməklə yanaşı, iş proseslərində və xidmət sahələrində tətbiq olunan yeniliklərdən yararlandıqlarını diqqətə çatdırıblar.