XII Bakı Beynəlxalq Kitab Sərgisi çərçivəsində F. Köçərli adına Respublika Uşaq Kitabxanasının təşkilatçılığı ilə uşaqlar üçün silsilə tədbirlər keçirilir. Təşkil olunan proqramda uşaq yazıçıları ilə görüşlər, kitab təqdimatları, ustad dərsləri, viktorinalar və rəngləmə fəaliyyətləri yer alıb. Tədbirlərdə “İdrak” liseyinin, 1 nömrəli internat məktəbinin,  292, 237, 187,172 bə digər təhsil müəssisələrinin, həmçinin sərgi ziyarətçiləri iştirak ediblər.

Proqram çərçivəsində Sevinc Nuruqızının “Humay və sehrli Huma quşu” və Gülzar İbrahimovanın “Bir gecədə dəyişən arzu” kitabları təqdim olunub. Müəlliflər kitab haqqında məlumat verib, oxucuların suallarını cavablandıraraq onlarla fikir mübadiləsi aparıblar.

Uşaqlar üçün təşkil olunan ustad dərslərində ziyarətçi uşaqlar əlfəcinlər hazırlayıb, rəngləmə və interaktiv fəaliyyətlərdə iştirak ediblər.

Keçirilən

tədbirlərin məqsədi uşaqlarda mütaliəyə marağı artırmaq və onların yaradıcılıq bacarıqlarını inkişaf etdirməkdir. Kitabxana bu təşəbbüslərlə uşaqları kitab dünyasına cəlb etməyi və mütaliə mədəniyyətini təşviq etməyi hədəfləyir.